Pomidor sərinliyi sevən bitkidir. Buna görə də 40 dərəcədən yuxarı hava temperaturunda yaxşı inkişaf etmir.
Özbəkistanın Kənd Təsərrüfatı Nazirliyinin mətbuat xidməti xəbər verir ki, respublikada Buxaranın isti iqliminə davamlı pomidorun yeni sortları uğurla sınaqdan keçirilib.
Mətbuat xidmətinin məlumatına görə, pomidor iyulun istisinə tab gətirərək sınaq prosesində yaxşı nəticə göstərib.
Tədqiqat zamanı Tərəvəz, Bostan Bitkiləri və Kartofçuluq Elmi-Tədqiqat İnstitutunun alimləri azca şoran torpaqlar və isti iqlim şəraitində hərtərəfli tədqiqat üçün pomidorun müəyyən sortlarını seçiblər.
Mətbuat xidmətindən verilən məlumata görə, Buxara vilayətinin çətin iqlim şəraitində yetişdirməyə yararlı sortun yaradılması üçün sınaqlar aparılır. Buxara Elmi Təcrübə Stansiyasında elmi tədqiqatlar 2022-2024-cü illər ərzində davam etdiriləcək.
Əvvəllər həmin elmi-tədqiqat institutunun alimləri həm istixanada, həm də açıq yerdə yetişdirilə bilən müxtəlif pomidor növlərini müəyyən etmişdilər.